Útikennsla og vettvangsathuganir í skólastarfi njóta vaxandi viðurkenningar sem mikilvægar og gagnlegar kennsluaðferðir. Örn Þorleifsson, kennari við Brúarásskóla, bóndi í Húsey á Fljótsdalshéraði og landgræðsluverðlaunahafi, hefur skipulagt vettvangsferð og útikennslu um jarðfræði, landgræðslu og menningu frá Kollumúla í Jökulsárhlíð til Möðrudals. Markmið verkefninsins er að nemendur öðlist skilning á landinu, jarðfræði og lífríki er viðkemur heimabyggð og tengist búsetu Íslendinga. Einnig að þeir öðlist heilbrigt viðhorf til nýtingar og verndunar lands, læri að umgangast landið og þykja vænt um það. Nemendur eiga að þjálfast í að lesa landið og geta útskýrt hvað er um að vera á hverjum stað, eins og hvort um landeyðingu eða landbætur er að ræða.

Samstarfsaðilar NEED verkefnisins í Noregi hafa búið til stórskemmtilegt myndband um jarðfræðilega sögu Storjord en það svæði er miðpunktur verkefnisins þar í landi.

Við hvetjum alla, unga sem aldna til að skoða myndbandið og hafa gaman af.

Eins og glöggir lesendur eflaust vita þá stóð til að hluti hins íslenska NEED hóps héldi til Írlands síðastliðinn mánudag. Vegna óviðráðanlegra ástæðna, eins og eldgosið í Eyjafjallajökli er svo sannarlega, þá var ákveðið að fresta ráðstefnunni fram á haust, n.t.t. 11. – 16. október 2010.

Það má með sanni segja að ástæður frestunarinnar séu í anda NEED verkefnisins þar sem að eitt af megin þemum verkefnisins er einmitt náttúruvá.